Construction worker pinagtangkaang patayin ng kapwa construction worker

Pinagtankaang saksakin ng dalawang construction worker ang isa sa kanilang mga kasama sa parehong trabaho hating gabi kahapon sa loob ng barracks sa Sitio Cagban, Brgy. Manocmanoc, Boracay.

Kinilala ang mga suspek na sina Joel Caadlawon, 37 anyos, taga-Samar at Vincent Hison, 22 anyos, taga Negros Occidental. Ang biktima naman ay si Ronnie Jacosalem, 31 anyos at taga Iloilo City. Ang mga nabanggit ay parehong construction worker sa una ng nabanggit na lugar kung saan nangyari ang insidente.

Ayon sa mga nakasaksi, naabutan umano nilang nagkaroon ng alitan ang magkabilang panig. Ang suspek na si Joel ay madala-dalang kutsilyo at tubong bakal at ang kasama nitong si Vincent ay may dala-dalang steel bar.

Sa alitang nangyari, tinangka ng unang nabanggit na suspek na saksakin ng kutsilyong dala nito ang biktima subalit nakailag ang biktima.

Agad namang kinuha ng isa sa mga saksi ang kutsilyo at nagkaroon na lamang ng suntukan sa magkabilang panig.

Nagtamo naman ng ilang sugat ang suspek na si Joel sa iba-ibang bahagi ng katawan nito.  Minabuti naman ng biktima na iparekord ang nasabing insidente sa Boracay Tourist Assistance Center police station.

Habang nasa himpilan ng nasabing police station nagkasando ang dalawang panig na ayusin ang mga nangyari.