Opinyon: Itaas ang moral ng mga kapulisan

Tila mainit sa ngayon ang isyu sa mga inaasala ng kapulisan na nagpapakita ng kawalang-galang sa posisyong nai-atang sa kanila.

Matatandaan na kamakailan lang, Mayo 23 ng madaling araw, isang pulis ng Boracay Tourist Assistance Center  o BTAC ang nagpakita ng kawalang-asal sa kanyang pananalita taliwas sa propesyong kinalalagyan nito.

Sinabi umano ng nasabing pulis, ayon sa nakasaksing security guard, matapos na hindi makita ng suspek sa panggugulo sa bar na hayaan na lamang  kung hindi makita at kung bumalik sa lugar at sinabi nito na hagisan na lamang ng garanada upang mataranta.

Nagdala ito ng pagkabahala at takot sa mga naroroon.

At ito lang ring nakaraang Lingo ay isa ring pulis ang nagpakita ng parehong paggawi. Ang naturang pulis ay PO1 ng Malay PNP.

Rumisponde ito sa nagkakainitang at nagtatalong doktor at habal-habal driver.

Sinuntok kasi ng doktor ang naturang driver matapos makipagkarera sa kanya sakay sa kanyang kotse. Bigla itong huminto at sinuntok ang driver ng motorsiklo.

Sa situwasyong ito ay hindi rin maganda ang inasala ng doktor at imbes na umawat, sinabi nito na buti suntok lang ang inabot mo hindi baril.

Dagdag pa niya sa harap ng mga nakikiusyuso na kung siya ang sakay sa kotse ay talagang babarilin niya ang mga ito.

Hmmmmm. Lumalabas yata na magkakampi sila ng doktor ah?! Arogante pa si Mamang Pulis sa kanyang posisyon ah.

Nagdala ito ng takot sa biktima ng panununtok dahilan upang huwag na itong magpablotter.

Nadismaya sa inasal ng pulis na ito ang mga naroroon sa nangyaring ito sa Caticlan, Malay, Aklan.

Kung ganito lang naman ang inaasal ng pulis, na tila asal kanto. Tila nakawawalang-tiwala sa taumbayan ang asal na ito ng tinuturing na lingkod bayan.

Huwag naman sanang magpatuloy ang ganitong pag-uugali ng mga lingkod-bayan at tagapagtaguyod ng kapayapaan at kaayusan.

Ang sa amin lang naman sa mga opisyal ng kapulisan, naway mabigyan ng leksiyon ang mga pulis na ito.

Sa mga kapulisan naman, ang amin lang naman kami po ay malaki ang tiwala sa inyo, nawa'y ingatan niyo naman ito at itaas pa nga ang moral ng mga kapulisan.

Bagong commercial development sa Boracay kinontra

Mariing kinokondena ng mga residente at turista ang ginagawang commercial development sa Isla ng Boracay, ang Puka Shell Beach na sinasabing isa sa sikat na lugar sa nasabing isla.

Ang Puka Beach na kilala sa pristine nature at lush forest covers ay sinisi­mulan nang i-develop ngayon para maging commercial land. Dahil dito, nagpahayag na ng protesta ang libu-libong residente at turista sa lugar para ipakita ang kanilang pagkontra sa dahilang sinisira nito ang ecosystem sa northern part ng nasabing isla.

Noong Marso 29, umaabot sa 8,417 katao ang nagkasundong lumagda sa petisyon ukol sa isyu bilang pagpapa­kita ng kawalan ng pabor sa nangyayari.

Sa kasalukuyan, isang bagong hotel na Seven Seas Boracay Hotel and Residences ang itinatayo na ngayon sa lugar.

Batay sa website ng Seven Seas, ang Boracay property ay magkakaroon ng pinakamalaking bilang ng underwater hotel resort rooms na 77 with large acrylic panel windows, na may 12 square meters na viewing area, na katumbas ng 192 inch ng viewing screen tanaw ang dagat. Inasahang magbubukas ang ope­rasyon nito sa kalagitnaan ng 2016.

Samantala, ilan naman ang nagpahayag ng kanilang sentimyento sa pamamagitan ng online.

http://www.abante.com.ph/news/vismin2/28912/bagong-commercial-development-sa-boracay-kinontra.html

Doktor, nanuntok ng habal-habal driver; pulis kumampi

ISLA NG BORACAY—Hindi naging maganda ang inasal ng kapwa itinuturing na tagapaglingkod-bayan at propesyonal na doktor at pulis sa nangyaring insidente sa Brgy. Caticlan, Malay, Aklan kahapon.

Ito ay matapos nanuntok ang naturang doktor at lumalabas na kinampihan ng isa sa mga rumespondeng pulis.

Napag-alaman na hinamon ng naturang doktor na bilisan ang pagpapatakbo ng parehong driver ng dalawang motorsiklo upang magkepagkarera kung saan muntikan na lamang matumba ang isa rito.

Base sa dalawang habal-habal driver lingid sa kanilang kaalaman na isang doktor ang nanghamon sa kanila.

Huminto sa kalsada ang itim na kotseng menamaneho ng doktor at sinuntok nito ang isang sa dalawang driver na kanyang nakarera.

Dahil dito nagkaroon ng mainit na pagtatalo sa pagitan ng doktor at ng dalawang naturang driver ng motorsiklo.

Dito na pumagitna ang mga kapulisan. Ayon sa mga nakasaksi, sinabi umano ng isang pulis na rumesponde na buti at suntok lang ang inabot nito mula sa doktor hindi baril.

Dinagdag pa nito na kung siya ang sakay ng naturang kotse ay pinaputukan na niya ang mga drayber na ito ng motorsiklo.

Dahil sa lumalabas na magkasunso ang pulis at naturang doktor ay natakot na na magpablotter ang naturang biktima ng panununtok.

Nabatid na marami ang nadismaya sa inasal na ito ng pulis at doktor nang mismong masaksihan ang pangyayari.

Resort staff sinaksak sa Boracay

ISLA NG BORACAY--Nagpapagaling ngayon sa ospital sa Kalibo, Aklan ang isang resort staff matapos itong magtamo ng saksak sa kanyang katawan sa Islang ito kaninang madaling araw.

Ang biktima ay si Federic Galache, 21 anyos at tubong Brgy Molo, Maasin, Iloilo.
Nabatid sa ulat ng Boracay PNP, na papauwi na ang biktima mula sa trabaho nito sa isang resort sa Station 1 nang mangyari ang insidente mag-aalastres ng madaling araw.

Bigla umano siyang nilapitan ng tatlong hindi pa nakikilalang mga kalalakihan habang naghihintay ng sasakyang tricycle kasama ang kanyang girlfriend.

Doon na sinuntok ng isa sa mga suspetsado ang biktima at sinaksak sa kanang bahagi ng kanyang katawan.

Mabilis namang nakatakbo para magtago ang mga suspek. Samantala isinugod kaagad sa District Hospital ng Boracay ang biktima subalit kalaunan ay inirefer din sa Kalibo para sa kaukulang paggamot.

Inaalam pa ngayon ng mga kapulisan ang motibo ng pananaksak.

Koreana, sugatan nang mahulog sa cliff diving resort sa Aklan

ISLA NG BORACAY--Nagtamo ng pasa at galos sa hita ang isang Koreana ng aksidenteng nahulog sa sikat na cliff diving resort na Ariel's Point sa Buruanga, Aklan.

Sa impormasyong nakuha ng Radio Birada! nagpapapicture ang biktimang si Eun Hye Jung, 28 anyos at residente ng Korea, kasama ang kaniyang mga kaibigan sa cliff area, o kung saan tumatalon ang mga bakasyunista para maligo sa dagat.

Habang nasa ganitong ayos aksidente itong nahulog mula sa itaas at bumagsak sa kawayang balsa.

Nahulog ito sa balsa imbes na dapat ay sa dagat dahil sa tahasang ipinasasara ng mayor ng nabanggit na bayan ang naturang resort dahil sa di umano'y mga paglabag nito sa operasyon.

Marami namang mga bisita ang nadismasya sa ginawang ito ng lokal na pamahalaan. Samantala, napilitan namang i-refund ng resort ang inilaang ng mga turista sa dapat sana'y cliff diving activity nila.

Napag-alaman na matarik ang nasabing cliff diving.