Mga delegado sa APEC nagsaya

Larawang kuha ni Darwin Tapayan

ISLA NG BORACAY--Hataw sa kasiyahan ang mga delegado na kalahok sa pangalawang Senior Officials Meeting (SOM2) ng Asia Pacific Economic Conference (APEC) meeting kagabi sa isinagawang dinner at welcome party para sa kanila dito.

Ang welcome party ay tinawag na "FuntaSea" dahil sa tema nitong tila nasa karagatan na isinagawa sa isang resort dito. Binuo ito ng Department of Tourism at Cultural Center of the Philippines.

Naaliw ang mga delegado sa tugtog, awit, sayaw, at magagandang disenyo sa paligid. Kabilang sa mga nag-perform ay ang sikat na mang-aawit na si Bituin Escalante, Ballet Philippines, Daloy Dance Company, Boracay Fire Dancers, at Black Beauty Boys na nanalo sa Ati-atihan 2015.

Ayon kay Usec. Laura del Rosario ng DFA, at chairperson ng National Organizing Council ng APEC2015 na pagkakataon ito sa mga delegado na pansamantalang iwanan ang mga suliranin kanilang hinaharap at ang pagiging sersyoso sa kanilang gawain bilang kalahok ng APEC meeting.

Nabatid na magtatapos na ang SOM2 bukas, Mayo 21 na nagsimula pa noong Mayo 10 dito sa isla. Napag-alam na rerepasuhin na lamang ng mga opisyal ang mga napag-usapan ng iba-ibang working group sa mga nagdaang araw ngayon.

Ang susunod na Senior Officials Meeting ay gaganapin sa Cebu sa darating na Setyembre.